ازاى حنستقبل رمضان وحنعمل ايه فيه
ايه رايكم لو وقفنا حد من اولادنا او شباب العيلة او السكيورتى او الحارس او البواب او ولادهم او بتاع الجراج او اى حد على مدخل شارعنا او على ناصيته لحظة اذان المغرب بالضبط يوزع على السيارات الماشية فى الشارع والناس اللى مستعجله تلحق الفطار على رجليها
تمر مغلف يعنى بلح طرى ( فيه جاهز كل تمرة فى كيس صغير - ممكن تحط 3-4 تمرات فى حته سوليفان صغير وتلفه وتربطه وبيكون شكله جميل ومش مكلف )
ومعاه كوباية مية او عصير صغير من ابو نص جنيه لواخدتها جملة وتبردها قبل ماتوزعها
شوف بقى وعد واحسب وجمع وبدون ميتاستوك ولا شارتات ولا توصيات موثوقة كمية الدعوات اللى حتاخدها وكمية الصائمين اللى حيستفيدوا وتاخد ثواب صيامهم عن النبي صلى الله علية وسلم قال: (من فطر صائما كان له مثل اجره غير أنه لا ينقص من أجر الصائم شئ)
ومش حنتكلف حاجة كتير يااحبائى ده لو ربنا كرمنا وماتعبلناش حد ولا تعلاضنا لحادثة عربية او باركلنا فى ولادنا ووفروا من الدروس الخصوصية او قللنا ايام الذهاب للمصيف او عزومة كان نفسنا فيها ووفرنا فلوسها او استغلينا 5 دقايق ساعة الفطار او...............
يعنى يكفيك فى رمضان كله لو جبت كرتونتين او تلاثة تمر من الحجم الكبير ب25 جنيه الكرتونة وكل يوم نقول حنوزع 50 قزازة ب25 جنيه فى اليوم مع التمر يبقى الشهر ب750 جنيه وسوليفان بالجملة ب10 جنيه وربطة خيط ب5جنيه يبقى كل مصاريفنا بتاعة 800 جنيه فى الشهر كله مع اكراميات الاولاد الى حيوزعوا لو انت حتتكسف تقف فى الشارع وللاسكندرانية اللى ناويين يجربوا الموضوع ده ممكن يجيبوا العصير من سوق المنشية بتاع الجملة الكرتونه هناك فيها 36 عبوة عصير ب13 جنيه والتمر هناك العلبة الكبيرة ب12 جنيه وكد كمان عرفتوا ممكن تجيبوا الحاجة منين علشان مانتعبش كتير وممكن الشباب اللى مايقدرش على المبلغ كامل يتشارك مع صحابه وقرايبه فى اقتراحنا ده
يلا نبتدى وننشر الموضوع ونلم حسنات ده لو عرفت حد الموضوع ده وعمله حيكون لك زى ثوابه ولم عملته انت حيكون لك ثواب كل الصائمين اللى حتفطرهم (أتى النبي صلى الله عليه وسلم رجل يستحمله فلم يجد عنده ما يتحمله فدله على آخر فحمله فأتى النبي صلى الله عليه وسلم فأخبره فقال إن الدال على الخير كفاعله)
موضوع: ازاى حنستقبل رمضان وحنعمل ايه فيه 
السبت أغسطس 15, 2009 9:56 am
